投資者日記 - 十七大前要抖抖

2007-10-13

　　10月12日，周五。恒生指數跌294.65，收28838.37；成交1952.7億元，今天出現少見嘅跌市成交多訊號。10月期指低水，跌483點，收28783點。新疆新鑫礦業（3833）首天掛牌收14.2元，較招股價6.5元升119％。城市電訊（1137）升60％，有報道話城電同中國聯通（762）合作申請香港3G牌照。新世界發展（017）升10％，見25.2元，因花旗調高目標價。中移動（941）跌1.1％，國壽（2628）跌1.9％。　　8月20日至今恒生指數上升41％，已進入極度超買區。國企指數升幅更高達73％，係彭博有追蹤全球股指中表現最佳。

　　花旗建議減持鋼鐵股，並吸納新世界發展（017），目標價27元；以及吸納新世界中國（917）。

　　滬深指數跌27.86或0.4％，萬科跌4％、保利地產跌6.2％、金融街跌4.9％、金地集團跌6.8％、招商銀行跌2％、中國銀行跌2.7％、民生銀行跌3.3％；但中信證券升4.5％，海通證券升10％，因今年首九個月獲利40億元（去年同期獲利2.597億元）。

人民幣短期將加息

　　中共十七大下周一召開，到時會唔會有較強硬措施對付通脹？

　　彭博估計，中國9月份CPI上升6.6％（8月份升6.5％）；外傳短期內人民幣將加息。

　　滬深A股市場對新股上市嘅反應有如1990年代末期美股。根據Thomson Financial數字：中國IPO上市首天平均升幅192％，大企業IPO上市首天平均上升83％。今年年初至今透過上市，中國企業共集資640億美元，較美國今年同期集資額大一倍。ING投資管理經理Uri Landesman認為，A股早已泡沫化。美林證券新興市場策略員Michael Hartnett認為，類似中國嘅股市因由散戶主導，往往响上升同下跌時皆出現過籠（overshoot）現象。今年上海A股指數已上升121％，內地企業正由國家擁有漸漸轉為上市企業，形成市場流通量不足（情況有如1972－73年本港華資企業上市後，家族仍持有75％股權嘅情況接近，又或1990年前日本企業透過互控，形成市場上流通嘅股份唔多），令股價升至異乎尋常嘅水平；加上企業純利高增長、社會高通脹以及低利率，令儲蓄存款流向房產及股市。而且政府仍限制內地人投資海外（甚至港股直通車仍未開出），許多因素造成內地A股股價極度偏高；上述情況唔會永久存在，但短期內持續，至於維持幾耐則木宰羊。

　　今天滬深A股一度見5959點，卻有50％股份嘅股價較指數响5000點時更低，即愈來愈多股份跟唔上指數（或整個市場較指數顯示為弱）。上述代表A股技術性轉弱，响十七大前要休息一下矣。

　　中國政府嘅國策係不斷壓抑房地產市場投機行為。過去新政策層出不窮，最新政策係銀行採取更嚴格措施針對購買第三套或以上住房。最受打擊係港商，一般都購買咗辦公樓、高層住宅同別墅，擁有三套房產或以上嘅港商超過六成。上述物業大部分都按畀銀行取回貸款做生意。新政策下，令港商不易獲得貸款（部分將跑回香港貸款，將令本港拆息高企）。

　　自2003年起，中央政府不斷有新房屋政策發布，目的顯然係保障住房供應結構穩定及住房價格穩定。內地為市場提供廉租房、經濟適用房、中低價位普通商品房，讓高級商品房只佔總供應量30％嘅四層梯級分布。對股市卻採開放態度，由供求關係與金融創新去為股市找尋合適水平，包括加大H股回流速度、加快基金QDII發行速度，甚至開放個人向外投資及建立股權期貨市場。換言之，政府對股票市場採寬鬆態度，但對土地與磚頭卻加強控制，相信係參考咗過去日本、台灣、南韓、新加坡及香港經濟發展後所制定。隨着H股回歸及加快基金QDII發行，內地A股正慢慢港股化、港股則緩慢地A股化；A股港股化可令內地投資者及官員了解國際市場嘅遊戲規則；港股A股化後則會擴大未來上落波幅。反而中國政府响房屋政策上提供一定保障性，唔畀內地房地產出現大幅波動（上述亦係過去台灣、南韓及新加坡政府嘅政策）。响上述措施下A股成為吸收風險資金嘅場地而容許大上大落，但樓市只容許緩升及緩降，唔容許大升及大跌。

　　周四恒指响佘當奴公布施政報告後第二天再炒上，但十七大下周一舉行。從上周恒指响26800點企穩睇嚟，後市展望恒指响27000點到接近30000點不足3000點之間上落。

　　好友將恒生指數推高至接近30000點，係咪已有D過火？會否後勁不繼？恒生指數經過8月20日至今嘅上升後基礎已差咗好多，淡友响7月26日至8月17日採取閃電攻勢，一下子將恒指由23557點殺落19386點，不足四星期令恒指回落17.7％，其後好友大反攻，至今未見淡友出招。預測趨勢改變唔係一件易事。周三美股好友佔60.2％，係2005年12月28日以來最高；三十天移動Put/call比率略低於64％，好友似乎多咗D。股市已進入嚴重超買區，出現調整係意料中事。

內地基民比例達九成

　　中國產業基金自1997年11月出台《證券投資基金管理暫行辦法》後，平均每年以複合增長率90％以上嘅速度增長，尤其係近兩年更高速發展。依家基金所持上市公司股票佔市場股票流通量25％，去年平均收益率128％，今年上半年基金平均收益率超過100％，已包括股票基金、債券基金、混合型基金、貨幣基金、ETF、LOF、保本基金、指數基金同QDII基金及產業基金。城市人口中，約15-20％已參與基金投資，個人投資者持有基金比例達90％，購買基金成為咗城市居民首選嘅理財方式。家吓基金管理公司有五十九間，管理基金三百四十隻，前十大佔50％以上市場，前五大公司管理34％基金資產；去年基金佔城鄉居民總存款10.73％。中國城鎮居民皆認為買基金較儲蓄存款好，投資基金較自己直接投資股票好（呢方面已超過港人嘅認知程度）。

　　基金業快速發展，令中國股票市場迅速成長，而市值已達30萬億元。大量優質企業如中國銀行、工商銀行、建設銀行等上市，透過IPO，大量優質國企獲上市地位，接受市場監管，再透過QFII引入外資及QDII，同港股日漸接軌，不但令內地投資者認識國際投資規則，亦令外資進入中國市場，帶入國際市場標準。有人認為A股大起大落唔好，我地睇吓美國納指何嘗唔係大起大落？港股亦一樣大起大落。

　　資本市場係利用大上大落方式去調節經濟，作為政府不應干預市場升降，只應加強監管，保證發行者資訊透明、公開、及時、全面，同時嚴格禁止內幕交易，保證投資者响公平、公正、公開原則下完成交易（但唔保證股市一定上升）。响呢方面，中央政府較特區政府做得更好（起碼中央政府至今冇動用千億元入市干預）。
　　資本市場係無法避免大上大落嘅（此乃投資者承擔經濟風險嘅代價），政府不應保證入市者一定賺錢，只保證一切交易响公平、公正、公開原則下進行，以便完成汰弱留強嘅結果。一、依家大中型國有企業好多已上市，但政府持股量偏高，應通過資本市場使國有企業政府所佔比重下降（此舉有助市場流通量）。二、中小企業上市太少，中國應發展場外交易市場（over-the-counter），讓更多公司响上市前集資，場外交易由特定投資者參與，例如產業基金及富有投資者，目的係協助中小企長大成為上市公司。三、對外開放度不足，呢點同人民幣市場未國際化有關。今天全球化嘅只有美元，甚至歐羅、英鎊、日圓亦無法全球化，何況人民幣？喺人民幣走向獨立自主前，仍有一大段路要走。日圓過去暴漲對日本經濟造成破壞，以及1997年亞洲金融風暴下各國貨幣兌美元暴跌所引發嘅金融危機，都係人民幣步向國際化前必須考慮嘅因素，亦係內地A股無法完全對外開放嘅理由。長遠而言，人民幣滙價唔應該同美元捆綁在一起而失去獨立性及貨幣政策主動權（1990至97年因香港聯繫滙率制度而飽受負利率影響，令經濟過度繁榮；1997年7月至2003年7月則出現通縮）。

黃金基金具吸引力

　　今天中國經濟對出口仍過度依賴，造成過大貿易順差，引發國際貿易爭端，因此必須努力改變經濟結構，減少貿易順差及減少對出口過分依賴。呢方面去年中國已開始，但距離形成一個成熟內銷市場嘅日子仍遠，例如缺乏本身品牌同技術、產品創新能力不足等，大部分企業仍然係加工貿易等。中國9月份外貿盈餘239億美元（一年前係153億美元）；出口上升22.8％、入口上升16.1％；首九個月外貿盈餘升69％，至1856.5億美元。人民幣2005年7月至今兌美元升10％、兌歐羅跌7％。睇嚟人民幣將面對更大升值壓力。

　　黃金又再耀眼，但呢一次同過去唔同，並非由需求推動，而係因美元滙價回落將金價推至五十二周新高。UBS估計，明年金價可見760美元；最樂觀係花旗，認為金價可升穿850美元，最高可見1000美元。

　　油價、金價雙雙攀升至新高。港股响直通車及QDII政策下，9月上升13.17％，冠絕亞太區股市（滬深指數亦只升6.39％）。上月表現最出色係金礦股同礦務股，根據Lipper資料，包括咗美林世界黃金基金、友邦黃金基金、天達環球黃金基金及法興金礦股票基金等。相信响2007年結束前，美元仲會減息一次或兩次，美元弱勢未改，主要係經濟數據差強人意；Lipper認為黃金基金有一定吸引力，而黃金基金9月份已有不俗升幅。

　　美國8月份貿赤較7月份減少2.4％，至576億美元，係今年1月以來最低，主因係農產品如小麥、大豆、玉米大量出口，其次係工業產品，令8月份出口上升0.4％，至1383億美元；入口減少0.4％至1929億美元，主因係汽車及傢俬入口減少。但油價上升令石油入口金額大升，對中國貿易赤字減少5.3％，至225億美元。除出口上升外，入口亦減少0.7％，相信同玩具出問題有關；其次係電腦同傢俬入口亦減少。今年首八個月美國外貿赤字7080億美元，較去年同期減少6.7％。上述數字未改變美元滙價方向，雖然美國貿赤已降至只佔GDP 5％。

降運輸成本壓糧價漲幅

　　建設一年多嘅蘇州獨墅湖隧橋工程10月10日正式通車，全長七點三七公里，其中高架橋長三點四三公里，另有三點四六公里响湖底隧道，地面輔長二點八六公里；投資27.1億元，係全國最長嘅一條湖底隧道。中國仍在大興土木。

　　為降低東北糧食嘅外運成本，國務院批准10月10日起經山海關入關嘅鐵路運輸，統一每噸收18元人民幣；運送糧食、棉花及農用化肥則免收鐵路建設基金。政府希望透過降低運輸成本，以壓抑10月份內地糧食價格漲幅。

投資者日記 - 港股成吸金機器

2007-10-12

　　　10月11日，周四。恒生指數升563.69，收29133.02；成交額達1787.12多億元。10月期指高水，升696點，收29246點。相信周五港股將保持上升。廣船（317）公布，今年1月至9月獲利估計上升250％（去年同期獲利1.86億元人民幣）。中石油（857）升5.89％，見15.44元；中海油（883）升5.59％，見13.58元；中石化（386）升11.39％，見11.34元；中銀香港（2388）升5.39％，見21.5元；九倉（004）升4.3％，見41.95元；越秀投資（123）升11.55％，見3.09元；中國遠洋（1919）升20.12％，見 39.1元。不過，亦有下跌嘅股份，富士康（2038）跌3.79％，見21.55元，摩通建議減持，未來目標價17元。　　滬深三百指數連續第五天高收。民生銀行升4.2％，上半年純利急升66％；招行升5.6％、中國銀行升3.3％、浦發銀行升3.4％、貴州茅台升5.4％、五糧液升5.1％、萬科升2.9％。

當航母陸續駛入滬市

　　8月20日自從中央政府宣布開放個人資金自由行（至今直通車仍未開出），港股獲重新評估（Re-rating），令恒生指數平均P/E升至二十二倍以上，恒指响七星期內上升40％。當H股股價漸同內地A股拉近，後市又點睇?!以工行H股（1398）為例，依家A股只有10％溢價。當航空母艦陸續駛入滬市，加上QDII因素，令滬深指數由8月20日至今升幅有限，卻推動同期港股上升50％。港股已成為內地股市嘅吸金機器，令資金流向改變。9月份中移動（941）、網通（906）、聯通（762）等升幅達到12％至35％，本月上升理由，只係回歸A股市場，可見其威力。8月20日至今，港股可用Up, Up and Away去形容。以大趨勢睇，大市仍在上升，近日二線股表現愈來愈出色。股市係咪偏高已經唔使爭抝（P/E 二十二倍以上），但資金仍不斷由內地湧入香港股票市場，你話怎麼辦？嘉實基金集資40億美元，卻獲得700億元人民幣認購，結果中籤率不足50％；工銀瑞信QDII則放眼全球、長盛基金只投資全球精選行業；上投摩根QDII 發行，重點投資亞太區股市，特別係香港，將通過工行、建行、交行、招行代為發售。內地愈來愈多QDII基金發行，資金大部分投資港股。

　　國內私人資本基金（Private Equity）開始大量出場，並命名為產業投資基金。上述基金最早誕生於美國，係一種向合格投資者募集資本，然後投資於非上市公司（如成長基金），以策略投資者身份介入投資公司管理，令企業成熟後上市，然後獲利退出；亦以策略投資者身份收購上市企業（Buyout），將之拆骨或整頓，創造價值後獲利。大部分以有限合夥人（Limited Partner）身份出現，小部分以主要出資人身份進行全面收購及拆骨重組。1991年International Digital Group以私人資本基金形式進入中國。當年中國監管體系同法規制度未完善，加上中國境內搵唔到識基金管理嘅人，發展十分緩慢。

　　1995年中央政府通過《設立境外中國產品投資基金管理辦法》，鼓勵國外風險投資基金來中國投資，1995至2004年係外資私人資本基金進入中國期。今天全球最大四家私人資本基金如百仕通、凱雷（Carlyle Group）、KKR及德州太平洋响中國都有辦事處；其他如華平（Warburg Pincus）、亞信（由中創同富達基金共同創立）等先後將廣州富力地產（2777）、亞商在線、哈爾濱藥業、國美電器（493）、鄂武商業發展等變成為上市公司。高盛集團入股平安保險（2318）及中國光大，新加坡豐隆協助玉柴動力在海外上市，都係好成功嘅例子。

　　去年最大變化係上述產業投資基金資本不但來自私人，唔少更來自國家或地方政府。如上海金融產業基金、山西能源基金、四川綿陽高科基金及中新高科產業投資基金、廣東核電新能源基金及渤海產業基金。保險公司亦籌組產業基金，例如國壽（2628）考慮將總資產10％放入產業基金，去年12月更收購南方電網一百九十二億股，成為第二大股東；去年7月平安保險購入深圳商業銀行89.24％。上市公司如西水股份投資興業銀行1.7億元，如今獲利十倍以上；雅戈爾投資中信證券亦獲利不菲。深圳市政府亦組成南海成長基金投資深圳上市公司。中國雨潤、江蘇利安達等十多民企組成世華聯合投資，投資未上市嘅民企……。換言之，去年起大量產業基金成立，令整個投資市場出現太多投資資金，不知是禍是福。

瞓身落細價股即是賭

所有人都係冇預測能力嘅，一如大部分人一樣，有時睇得準，亦有時睇錯。只要你精於揀股同時學曉掌握時機，投資細價股都幾好玩。好多人所犯錯誤就係將身家性命財產都瞓落去一隻細價股身上，呢D叫做賭，唔係投資！

　　如只將財富10％投放响一隻細價股身上，一旦虧損15％或以上便止蝕，如上升便揸住唔放，往往帶來幾可觀嘅回報（例如100％、200％，甚至五倍、十倍回報）。有個化妝品嘅廣告用咗西班牙建築界權威嗰句話：Less is more（响建築界叫做簡約），其實响財經界亦管用。如你只用財富10％去投資二線股，你可以守落去……，類似例子如第一拖拉機（038）、廣船（317）、南方航空（1055）、有利建築（406）等，都產生Less is more效果，其回報係100％、200％……，而你唔需要係投資界天才，只要科學化篩選二線股便可。一如麻鷹响空中盤旋，直到見到獵物，便以閃電速度攫取，如有利潤便死揸不放（止蝕唔止賺）。當然，獵鷹亦有失手嘅時刻，但只要擊中一次，便可以用1萬元賺取2萬元……，如此類推。我地挑選嘅係 Millionaire-Maker Stock，唔係追隨大市升降嘅大藍籌股，例如畢非特透過投資中石油，幾年便賺取600％以上利潤。最吸引係嗰D轉虧為盈嘅二線股，呢類股份往往可爆炸性上升。

　　有D股份擁有其他公司所冇嘅特權，例如港交所（388），响政府保護下，本港只能有一間交易所，別人無法侵佔其利益，回報往往十分驚人。

　　有D股份曾出現一、兩年烏雲掩蓋期，例如偉易達（303），曾因一次收購出現錯誤而出現一、兩年業績倒退，然後重整旗鼓。各位可嘗試搵其他類似偉易達嘅股份去投資。有D股份出現純利突破期，例如過去曾推介嘅精優藥業（858），喺糖尿病藥研究上有突破性進展。

　　有D股份經重新包裝後市場佔有率狂升，例如美國嘅蘋果透過iPod獲得龐大盈利。有D股份出現行業性改變，例如2001年嘅資源股。

學習享受失敗

　　投資二線股嘅策略係Double或虧損15％離場，但唔好感情用事。勝敗乃兵家常事，千萬不可有輸唔起嘅心態。其實，每一次失敗都令你更接近成功，聰明嘅人從失敗中悟出成功嘅秘訣，只有愚蠢嘅人先至會倒地不起。請唔好再受恒生指數見29000點所困擾，學習篩選股份。投資二線股之道係細細注、大大聲（Less is more）！唔好後悔過去曾錯過嘅機會，請為自己未來嘅夢想而努力，學習如何Double Your Money！去年係內地航空股，今年係建築股，明年高科技股？1986年如你投資10萬美元响微軟上，今天你擁有2300萬美元！Google 2004年8月以85美元上市，最近市價已超過600美元，即呢間公司市值1870億美元，已八倍於通用汽車（1953年通用汽車係美國最大嘅上市公司）。

　　SOHO中國（410）10月8日成功來港上市後，主席潘石屹透露集資所得主要用作擴張土地儲備。依家公司只有120萬平方米，呢次集資128.6億元，將集中投資北京市中心商業區，建立高端物業。SOHO中國今年嘅利潤目標已完成，2008年利潤目標亦完成超過30％，資金用作未來計劃。

　　1978年改革開放政策落實，1979年深圳作為試驗特區，形成大珠三角，過去十年粵港一體化係另一成功例子。長三角同環渤海由於較大珠三角遲十年起步，眼見過去十年粵港一體化取得成就，最近提出「中國六大都市圈」藍圖，即將全國一線城市如香港、深圳、廣州、北京、天津、上海連在一起互補長短。上述六大城市包括大珠三角、長三角及環渤海，佔全國20％人口，但佔全國40.6％ GDP；計劃到2020年，六大城市以軌道交通、超級公路連在一起，成為世界上少有嘅「六大都市圈」，有機會成為全球最繁盛嘅「都市圈」！透過建立更公正嘅法制、更透明嘅政府運作、更具活力嘅商業活動、更高嘅文化及研究水平（因為全國最著名嘅研究機構及高校都集中响六大都市，係全國人口中接受教育最高水平嘅城市，亦係最高收入城市、最高醫療水平城市、開發資金聚集最多城市……），達致全球最繁盛都市圈嘅目的。

　　根據Lipper報道，9月股票強積金平均回報為8.77％，表現優於其他類型基金。投資中國、香港及南韓分別上升15.89％、14.37％及 12.15％；混合型強積金9月平均回報5.17％。最佳為大福香港特區基金升21.38％，景順中港股票基金升17.11％，富達香港股票基金升 16.5％。表現最差係投資日本嘅基金，平均只升2.26％；宏利日本股票基金升0.85％，萬全歐洲股票基金升1.17％及中銀保誠日本股票基金升 1.39％。

　　美國次按市場繼續出問題，Thornburg Mortgage宣布虧損11億美元，令股價急跌，估計美國次按危機同住宅物業市場回落一直延續到2009年。次按及房地產兩大行業仍係投資者少沾手為佳嘅行業，雖然已證明整個美國經濟唔受次按問題及住宅樓價回落所影響。美元減息後，信貸仍在收緊，從呢點睇，美國未來通脹率唔太令人擔心。美國GDP仍可保持低增長，美國消費市場亦可繼續溫和增長；加上美國國際貿易赤字7月開始收窄，美元滙價前景亦唔太令人擔心。8月17日嘅公開市場利率協議決定，證明聯儲局已由對抗通脹轉向對抗經濟可能衰退，能源及食物價格估計2008及09年回落。即使中國通脹率前景亦唔太令人擔心，9月同10月極有可能係內地通脹率最高峰期，然後慢慢回落。估計人民幣利率有一天同美元利率睇齊，但人民幣加息又可吸引更多熱錢流入中國股市同樓市，刺激人民幣進一步升值。短期A股仍看漲。

　　希拉莉會否成為美國首任女總統？有咁嘅可能，因為美國人懷念克仔時代，愈來愈唔喜歡殊仔時代。克仔時代並冇次按危機，樓價亦唔會下跌，更加冇「九．一一慘劇」，冇伊拉克戰爭，美元亦不致跌到1.42兌1歐羅，油價唔係80美元一桶，當年金價仍在反覆回落……。克仔代表good old days；至於殊仔過去七年不提也罷。

投資者日記 - 四大天王主導全球

2007-10-11

　　10月10日，周三。恒生指數上升341.29，收28569點；成交1537.8億元。期指低水，只升167點，收28550點。 多元化城市需要基建。

　　施政報告將最高個人入息稅率降回15％、有限公司稅率降回16.5％，令高收入人士（約七萬打工仔）受惠，並加強香港嘅競爭力（因新加坡企業稅率為 18％）。政府未來五年計劃投資1000億元响基建項目而創造二十五萬個職位，為捱咗十三年不景氣嘅建築業（1994年起計）注入強心劑。地產方面，除咗今年4月至9月唔使交差餉外，明年首季亦可免，當然仲有其他項目。

　　呢份施政報告嘅特點係強調十大建設。1997年7月主權回歸後，好多大型基建項目都無法上馬，搞到紮鐵工人開工不足而走去示威、建築工人去咗澳門做黑工、建築師紛紛去內地謀求發展，建築股由1994至2006年都係一浪低於一浪。睇吓外國嘅國際金融中心都係多元化城市（Cosmopolitan），不但有文化事業，亦有良好基建及環保。海近十年愈來愈多元化，香港過去十年响基建上則停滯不前。十年香港、十年上海，兩者拍埋一比較，真係令港人汗顏。

中國成長速度四倍於美國

　　受摩根大通推介中銀香港（2388），今天股價上升2.6％，見20.4元，係2月15日以來最高。工商銀行急漲8.9％，因獲批准經營QDII。

　　花旗推介民安控股（1389），目標價4.35元；長實（001）目標價155.76元。民安乃非人壽保險公司，正迅速擴展內地網絡，今年下半年至明年將增加九個省分行，估計今年每股獲利23仙，上升66.7％，未來P/E十三點三倍。另一方面，根據中原地產報告，長實今年可售出超過四千個住宅單位，成為住宅樓市向好嘅受惠者，估計每股獲利10.4元，上升52.3％，未來P/E十三倍。

　　麥肯錫經過六個月統計同考察，得出研究報告係，當今主導全球經濟走向嘅「四大天王」分別係油元、亞洲各國央行、對沖基金及私人股本資金，成為全球經濟嘅新權力核心。上述「四大天王」控制資金去年底達8.4萬億美元，佔全球金融資產167萬億美元中嘅5％。其中一個新興力量係中國人民銀行，管理1.1萬億美元，係全球對沖基金自有資金（唔計借入資金）嘅四分三，亦係亞洲各央行外滙儲備3.1萬億美元嘅三分一。過去投資美國政府債券為主，近期逐步向風險領域擴張。其次係油元（包括政府同私人），擁有海外金融資產達3.4萬億至3.8萬億美元之間，如油價保持响70美元一桶以上，每年可增加6280億美元用作投資，成為金融市場第二股不可忽視嘅力量。其餘係對沖基金、私募基金及其他金融創新基金，去年底對沖基金管理資產達1.5萬億美元，佔英美股票市場同債券市場總交易額30-50％。上述四類資金响全球資本市場發揮巨大作用，例如壓低美國長期利率，助長美國貸款大幅增長，而令住房價格及股價節節上升。呢D 資金如從一國流向另一國，可引發一個國家經濟繁榮與衰退，造成市場不穩定性。換言之，今天金融市場嘅風險較從前大好多，但同時提供更多機會。冇人能估計上述四大力量將全球經濟帶向何方。

　　渣打銀行經濟學家格林認為，中國一年相當於美國四年，中國正以美國四倍嘅速度成長。例如中國二十多歲孩子嘅轉工速度，可讓你目瞪口呆，摩天大廈响你成長嘅地區拔地而起，三幾年內整個地區變到你差D唔認得。國際形勢正在此消彼長，過去美國靠四個全球化成為全球超級強國（一、全球精英集中美國；二、全球資金集中美國；三、美鈔成為全球流通貨幣；四、美國軍力可以喺二十四小時內到達地球任何地方）。中國1978年以一窮二白起家，係靠拚命三郎精神，最先係省吃儉用，然後將民間儲蓄變成建設資金，再開放大門歡迎外資流入成為世界工廠，為全球創造價值，中國只賺取低微報酬，利潤都被跨國公司攞到手。然後中國由工業走向金融，上海同深圳金融市場呢幾年迅速冒起，美國才驚覺中國已經長大啦！中國靠嘅係數千年練出來嘅「四小哲學」：甲、自己細小時積累能力；乙、日漸長大靠嘅係吸收能力；丙、有力量時要包容別人，所謂有容乃大；丁、當別人感到威脅時嘅應變能力。今天中國經濟再唔使摸着石頭過河，但小心變成鐵達尼號。响全球化驚濤駭浪中，仍須小心駕駛及從別人錯誤中收取教訓，例如1990年日本、台灣，以及1997年7月嘅香港。

強化金融制度迎接泡沫爆破

　　日本經濟從1960年代開始起飛，三十年後到1990年泡沫爆破；日經平均指數由1982年9月至89年12月，狂升七年……。香港經濟從1967年開始起飛，三十年後係1997年；恒生指數由1989年6月5日起步，1997年8月爆破，共八年。中國經濟1978年開始起飛……。滬深指數由兩年多前 800點，升到今天5700多點（日經平均指數由1982年9月7000點上升到1989年12月39000點，只上升四點六三倍；台灣股市由1983至 90年上升二十六倍；泰國股市由1986至93年上升十二倍；香港股市由1969至73年上升十八倍；南韓股市由1985至89年上升六倍）。任何國家或地區經濟，由新興市場走向成熟前，股市必出現一次或以上泡沫化，即使成熟如美國，2000年亦出現科網泡沫。問題唔係在於點樣阻止泡沫，而係一旦爆破後阻止佢擴散而影響整國經濟。响呢方面美國相當成功，日本則相當失敗，台灣介乎兩者之間。其中最大因素係金融業應變能力，日本嘅毛病係讓地產業拖垮金融業；反之，美國金融業2000年並未受科網泡沫影響，甚至次按危機，美國金融業仍十分健全（1997至2003年香港地產泡沫爆破期間，本港金融業亦好健全）。換言之，中國政府嘅策略唔係要阻止泡沫形成（冇一個政府可成功），而係強化中國金融制度。再以台灣為例，1983至90年股市狂漲期，政府一再壓抑樓價，因此漲幅只有二倍以上；股市泡沫爆破後，台灣樓價到1996年亦只回落20％。南韓政府更加成功，1986到91年房價只上升80％，當股市泡沫爆破後，房價跌幅僅10％；反觀日本1990至2003年樓價跌幅達70％，至今升幅有限。香港1997至2003年樓價跌幅雖然達65％，但金融制度健全，令經濟由2003年7月起迅速復甦。中國政府近年已經一再壓抑房地產；換言之，中國政府已做好股市泡沫一旦爆破所需嘅安全措施。

　　依家A股P/E七十一倍（滾動P/E四十六點六倍），╱七點七倍（最新資產值亦達六點七倍），早已進入泡沫期。從中央政府近兩年所做嘅措施睇嚟，中國有能力應付股市泡沫爆破所帶來嘅後遺症，而唔影響整體經濟發展。

　　中國8月份CPI增長率達6.5％。如要阻止資金流入股市同樓市，銀行存款利率必須高達8.5厘以上，上述係唔可能嘅，不然人民幣滙價肯定狂升。估計中國CPI增長率高潮响今年9月同10月，然後慢慢回落。因為中國CPI上升主要因素係食物價格升18％（豬肉升49％，蔬菜升22％），扣除食物、能源等因素，中國核心通脹率只有2.7％左右。換言之，十二個月後中國CPI升幅回落到3％以下機會好大，中國負利率期估計响九個月內結束，政府亦利用A股泡沫期壯大國營企業嘅實力（國企上市及本港國企回歸A股市場），一來可吸收過剩資金，二來國企壯大後，未來下跌幅度減少。其次係疏導資金到海外（例如 QDII），主要係利用港股去吸收內地過剩資金。最終A股何時見頂及未來調整幅度幾多，則只有事後才知曉。

　　價值投資者可能錯過8月中至今嘅上升大浪而認為股市瘋狂，唔少人認為已進入類似美國科網泡沫潮嘅尾段。事實並非如此，因為價值（Value）係十分抽象，何謂偏高、何謂偏低？往往事後才知道。

注意浴缸滿瀉效應

　　雖然整體而言港股已進入極高水平（P/E 二十二倍以上），但仍然有大量股份處於偏低水平，可以用極之吸引嘅價錢購入，咁先至係揀股技巧。

　　滬深A股今年內上升114％，H股指數今年內只升70％，即升幅計仍落後內地A股44％。由於H股由唔少外資大量持有，家吓H股低於A股30-40％嘅情況會否消失就唔清楚，因為H股同A股不能互通。值得注意嘅另一現象漸漸出現，就係所謂「浴缸滿瀉效應」，即 overflowing bathtub effect（開咗水喉，浴缸先滿，由於忘記關水喉，最終水由浴缸流到周圍都係）。8月17日中央決定個人資金自由行後，最先滿瀉自然係紅籌國企股，然後其他藍籌股如長實、新地（016）……最後整個股市，包括大部分二線股。雖然港股直通車仲未開出，有幾多私人資金已透過地下金融活動流入香港？大家心中有數，但官方唔會正式公布。

　　點樣跑贏大市？Heritage Fund主席David Hollond（管理27億美元資金）教我地：就係喺非傳統增長行業中找尋增長股！多D留意產品周期（product cycles），以及公司營業額及純利上升周期。行業本身有盛衰周期（cyclical industries），例如新力推出PlayStation 3及蘋果電腦推出網上下載iPod，都引發產品周期現象，即由一個產品帶動公司營業額，然後純利上升，最後刺激股價……。例如最近CROCS推出塑膠鞋引發消費熱潮，為該公司帶來強勁營業額及純利，如此類推。

　　本周四中國人民銀行向各商業銀行再發行1520億元人民幣定向票據，以進一步凍結銀根。過去習慣係定向票據推出後一星期加息，由於十七大開會，估計呢次可能延期到11月才加息，即先等候美國減息0.25厘後，人民幣才宣布加息，以便人民幣同美元息差進一步收窄。

　　上投摩根亞大優勢基金下周發售，認購下限10000元人民幣，係業內第四隻QDII基金，其中80-90％資金將用作投資股票包括澳門、南韓、香港、印度及新加坡，而區域性基金較單一市場風險又細好多。換言之，內地資金繼續流港。

　　受信貸收縮影響，估計金融市場將漸漸平靜下來，尤其係美國住宅樓投資方面，但對股票市場影響唔大（可能反而有利，例如呢次減息，理由就係美國房地產放緩）。從8月10日公開市場利率協議小組開始擔心經濟增長放緩，到8月16日決定減貼現率，到9月份集體同意聯邦基金利率改為4.75厘，相信10月31 日亦好少人反對再減息0.25厘，因為聯儲局已改變態度，變為積極防止經濟衰退出現。

投資者日記 - 佘當奴有好消息公布

2007-10-10

　　　10月9日，周二。恒生指數升457.75，收28228.04；成交1290.49多億元。10月期指升593點，收28383點。　　地鐵（066）小股東按大比數通過收購九鐵，代價120億元，包括三條鐵路及其物業發展權。停牌前地鐵收25.6元，估計周三復牌後可再上升。

　　今天交通銀行（3328）升13％，見11.28元；國泰航空（293）升6.1％，見21.85元。兩隻新股掛牌，中國奧園（3883）較招股價升31％，報6.8元；金山軟體（3888）升39％，報5元。

　　估計周三佘當奴會有好消息宣布，例如將標準稅率恢復到15％，預料可刺激股市進一步上升。

央行例必聯手救市

　　後市展望，恒生指數最大可能性係O二十二倍至二十四倍之間上落，即27000到30000點之間牛皮消化；唔好同大趨勢（Trend）對抗！ 10月31日聯儲局第二次減息前，估計大市應該冇事，雖然如群眾情緒走向極端（例如RSI超過80），調整一下難免。美元轉弱，恒生指數肯定轉強，因為外資流入；反之，美元轉強一段日子後，恒生指數便開始要擔心。經過1990年日本及1997年香港情況後，每次信貸市場出現危機，聯儲局同各國央行例必聯手救市，咁情況下股市又點能夠大跌？類似今年7、8月份跌市已經算係「熊市」矣。每一個趨勢都有本身性格：2003年4月開始上升趨勢就係每年嚇你一次（例如2005年4月、2006年6月、2007年8月），下一次嚇你可能係2008年事。

　　2003年7月1日起生效內地人來港自由行，徹底改變本港零售業同酒店業；今年8月17日宣布內地個人資金自由行雖然仲未落實，亦已經攪動了港股，徹底改變本港金融業，不但令恒生指數由8月份19000點升上10月份28871點（漲幅50％以上），而且每天成交額由幾百億元升到最高見 2000億元。有人認為港股已A股化，實情的確係咁。H股經過8、9月份狂升後，亦漸漸同A股差距拉近，未來大市開始消化過去兩個月升幅。

　　中國經濟發展一如香港（香港起步點係1949年，中國係1978年），最先係解決溫飽問題（香港係1950、1960年代，中國係1980年代），然後進入小康（香港係1970、1980年代，中國係1990年代）。到1990年代香港開始進入富裕社會，1997年後社會進入20╱80時代；中國 2003年開始亦步入富裕社會。

服務中產行業陷不景氣

　　1997年3月到2007年3月，香港人月入5萬元以上家庭數目由25.35萬個增至57.46萬個，升幅達126.6％；同期月入8000元或以下家庭由22.82萬個增至46.17萬個，升幅102.32％；月入8000元以上、5萬元以下家庭由14.267萬個下降至12.011萬個，減少 16.52％。過去十年本港家庭數目增加3.29萬個或17％。過去十年本港月入5萬元以上中上層家庭數目大增超過一倍，代表有三十多萬中產家庭移向中上層；月入8000元以下家庭亦上升一倍，即同時有唔少家庭跌落貧窮階級。社會上最大多數（月入8000至5萬元）家庭數目卻減少。香港家庭平均收入由 1997年21425元一個月，上升到2007年23500元一個月，升幅只有9.6％，升幅極之有限。獲較大加薪幅度反而係月薪50000元或以上高薪人士，而非一般中層職員。上述變化令名牌市場十分興旺（因消費者人數上升一倍以上），同時服務低收入行業亦興旺起來（因人口亦增加一倍以上），但服務中產行業卻面對人口減少17％而陷入不景氣。

　　家吓一百方米或以上樓面住宅只有八萬一千三百萬個，可見豪宅供應量幾咁不足；其中五萬七千五百個係一百方米以上、一百六十方米以下；真正算得上係豪宅（一百六十方米以上）供應量更只有二萬三千七百萬個，嚴重供不應求，令2003年至今豪宅售價狂升，依家已超過1997年水平。七十方米以下住宅單位供應量達八十八萬九千五百個；七十方米以上一百方米以下達十二萬六千七百個，呢個市場家庭人數過去十年減少而非增加，因此一百平方米或以下住宅樓無法重見1997年高價。低收入家庭人口大幅上升一倍，形成對公屋需求回升，政府或者有需要多建公屋（唔係居屋，居屋市場需求在下降中）。過去十年香港高收入家庭與低收入家庭數目同時增加，中產家庭卻在減少，上述情況早1980年西方發生，1997年亦香港發生，近年亦中國出現。至於點樣處理，至今冇乜良方。

內地推期指預防泡沫爆破

　　西方國家過去曾面對上述問題，有D國家企圖以稅制去減少社會不平衡（例如加拿大、日本），有D國家走社會主義路線（例如歐洲），結果不但無法改變社會上20╱80情況，反而令全國GDP進入低增長期。1980年代美國同英國政府放棄改變20╱80現象，國家GDP才恢復高增長，但20╱80現象進一步惡化。香港自1997年7月以後，20╱80現象日漸明顯，依家仲未有善法處理。

　　中國證監會期貨部副主任黃運成中國金融衍生品高峰論壇上表示，已有近四十家公司獲金融期貨經紀會員資格、七家公司獲交易結算會員資格、兩家公司獲全面結算會員資格。

　　從國際期貨市場發展史睇，金融期貨公司不但推動金融衍生品市場發展，同樣促進商品期貨發展。中國期貨市場正進入金融期貨及商品期貨並存期，股指期貨上市後，外滙、利率等金融期貨亦將陸續上市，為現貨市場投資者及參與者提供避險工具。

　　從國際市場經驗講，以標普五百、恒生指數、日經等海外市場調查總結，當股票市場處於牛市期，股指期貨推出可加大股市波動，熊市或牛市末期反而可減少股市波動，內地投資者不必對推出股市期貨而恐慌。波動存在可產生不正常價差，同時產生投資機會，可透過期貨與現貨之間價差而產生套利交易，減少股市波幅。未來內地A股期指冇100萬元買唔到一手合約（10％孖展），目的係唔鼓勵個人投資者參與期指交易。而監管層只批出兩個全面結算資格、三張交易結算牌及幾十個經紀業務資格，對股市期貨市場建設仲未夠；另外，銀行方面亦無一家出現。從呢點睇，今年11月內地期指無法推出，估計可能推遲到明年內地才有期指交易。

　　今年7月推出「國民穩盈寶一號」將係內地第一家涉足股指期貨信託產品，9月12日再推出「震雷股指先鋒」（集資1億元，最低認購額100萬元）將係第二隻。兩隻期指基金均以套利為主，一旦淨值出現20％以上虧損便進入清算模式，並停止一切新交易。任何時段股指期貨單向隔夜倉唔超過信託淨值40％（以10％保證金計算），每次中長線投資損失控制信託淨值5％以內，每次套利投資損失控制信託淨值3％以內。估計年收益可在10％。一旦超過10％，管理方面可抽取盈利30％作為管理收益；一旦超過100％，管理方面把50％作為收益；如超過300％，管理方面提取盈利70％作為管理收益。滬深A股指數5764點，已經極接近6000點。市場上關於泡沫警覺聲一浪高於一浪，如明年推出期指，一旦泡沫破滅，參與者可透過拋空期指而賺取利潤，亦可透過認購上述基金而分享利潤。期指亦可作為基金預防泡沫爆破之用。

中國市場對外資日益重要

　　今年8月中國A股市場股票市值首次超過全國GDP總值，投資者賬戶數超過一億一千八百萬戶，代表最少四千萬股民。中國人收入來源有三：一、資本；二、土地；三、勞動力、生產資料與知識技術。城市內，絕大多數居民冇土地，過去主要收入來源係勞動力、生產資料及知識技術為主。經過二十八年改革開放後，資本累積達到一定程度，部分市民通過將部分儲蓄轉化為投資而進入以資本去賺取收入期，成為另一收入來源。上述情況三百年前英國發生，戰後日本發生，近年才中國出現。其實，中國早1872年晚清政府時代已出現第一家股份企業上海輪船招商局；到中華民國時，中國證券市場發展已十分蓬勃，可惜戰禍連年，加上中華人民共和國成立後走共產主義制度，令中國股票市場唔再存在，直至改革開放後才再形成。家吓中國股民最少四千萬，可以講股市已深入民間，持有超過22萬億元市值股票，令大量國企漸轉為公私合營（最大股東係政府，但股票市場上交易）。未來股市升降對社會經濟影響力好大，股市與中國經濟已進入互動時代，不但成為中國市民另一收入來源（透過資本去賺取利潤），同時亦代表中國經濟走向「公開、公平、公正」原則運作。而利用資本逐利，亦漸成為中國市民另一重大收益來源。

　　1998年由A.T. Kearney所作調查，跨國公司中國有三分一係虧損、25％收支平衡、當年中國只係一個好有潛質市場，但並非可獲利市場。但到2006年，美國五百間大企業中，有一百零八間宣布超過5％營業額來自中國。以Caterpillar為例，1978年已進入中國市場，但營業額真正起飛係2001年以後事，今天2.5％營業額來自中國，估計到2010年更可大幅上升。中國已成為美國企業未來營業額增長所在，亦係純利增長來源，例如英特爾去年14％營業額來自中國。中國市場對外資而言愈愈重要！

投資者日記 - 二萬八見阻力

今天開始每天 (盡量) 發佈超哥的投資者日記, 超哥...曹仁超也, 原名曹志明

2007-10-09

　　10月8日，周一。恒生指數一度見28482.42，才回落到27770點收市，跌61.23；成交1540.5多億元。10月期指收27790 點，跌134點。大市再次顯示28000點以上有阻力，因為恒生指數平均P/E已達二十二倍，進入極度偏高期。理論上，恒指P/E二十二倍以上，投入市場資金只宜佔全部投資資金30％；股市經七個星期反彈，未來升幅仲有幾多?
　　8月17日至10月2日股市表現，可證明投資者情緒改變所帶來影響。透過減息半厘可令投資界由預測衰退轉為預測繼續繁榮，再一次證明投資係非理性。
　　再以港股直通車為例，由8月20日公布至今仍未落實，但恒生指數已上升40％，H股由落後A股變成超前。過去七個星期H股升幅之大，A股亦追唔上。

人民幣上升空間大

　　股市經過2005年4月調整、2006年6月調整、2007年8月調整後，下一個大調整市幾時出現?以幅度計，調整幅度一個超過一個（而8月至10月大反彈可以超過9000點，同時七個星期內完成）。2000年A股由P/E六十三倍回落，今天A股（歷史P/E）亦達六十倍，各位又點睇?恒生指數重見 28000點之後，下一站係幾多?

　　SOHO中國（410）首日掛牌，收9.55元，較招股價上升15.1％。內地A股市場地產股如萬科升10％漲停板，保險股及銀行股表現不俗，煤炭、石油、有色金屬、鋼鐵股則表現較弱。人民幣再升0.01％，成7.5006，係2005年7月以來最高；十年期債券息率4.34厘，較9月28日4.4 厘略低。黃金周後資金略為鬆DD，未來人民幣上升空間仍大。滬深A股黃金周後開市再升1.3％，收5653點；上海A股升2.55％，見5975 點；深圳A股升0.58％，見1619.16。大家都等候十七大之後中央政府有乜新政策。

　　上海12月期銅價下跌430元人民幣或0.6％，成67630元人民幣一噸；鋅價更下跌3.1％，至26295元人民幣一噸。過去二十年有十三年油價第四季下跌，花旗、德銀及滙豐估計今年亦唔例外。75％分析員估計第四季油價將回落，德銀估計年底油價低於70美元。

　　雖然面對美國同歐洲（包括英國）經濟增長率放緩，但全球經濟尤其係新興市場所受影響有限，因為家吓新興市場處於過熱情況，如世界經濟增長率放緩，反而令佢地所受通脹壓力下降，原材料價格上升壓力減低。

　　中國8月份CPI升6.5％（扣除食物因素只升1％），生產商價格指數上升2.5％，主要係工資上升10-13％；但生產力提升接近20％，即每一單位勞工成本仍在下降。

大升大跌唔係人人頂得順

　　滬深A股由2005年6月6日807點升至今天5653點，今年純利P/E已超過六十倍，但每天仍有二十幾萬新投資者開戶加入市場。《金融時報》認為，內地兩個A股市場兩年前唔過3萬億元人民幣，到今年9月底已達25萬億元，估計年底可達30萬億元，已超過中國GDP總和（2006年21.087萬億元）。美國股市總值係GDP 130％，日本、韓國、印度約100％，中國今年底股市總值一下子達到GDP 140％……。

　　隨著上市公司質量提高，行業代表性愈來愈強，銀行股、保險股上市，中國鋁業（2600）、中國遠洋（1919）、中國神華（1088）、中國石油（857）等龍頭股回歸A股市場。中國證券化速度，甚至以新興國家發展歷史睇亦算神速。

　　10月港股會否重演7月市況?有D令人擔心，但唔好估頂，通常10月回落風險較9月大。一個大幅波動中股市找尋賺取100％利潤項目已愈來愈困難。踏入今年7月，股市唔係大升就係大降；呢類Roller-Coaster Ride唔係人人頂得順。有人減持股份後撥小部分錢去炒賣期權，亦不失為良好策略。

　　香港GDP已連續十五季上升，最近增長率更達6.9％。來自中國及海外資金推動本港股市及樓價上升，令今年全年GDP增長率可達6％（之前估計5.3％）、明年5％（之前估計4.8％）；核心通脹率3％，明年3.9％。如短期內再減息，明年本港經濟將陷入滯脹期。

　　花旗推介中國電信（728），目標價22元，並建議減持中國汽車製造股如駿威（203）、東風汽車（489）、長城汽車（2333），因為汽車製造業純利增長率今年見頂。

　　今年8月聯儲局終於放棄抵抗通脹，宣布減貼現率半厘，9月聯邦基金利率亦減半厘，令人擔心通脹率又再回升。油價、金價已上升，美元價回落。不過， OECD國家CPI主要成分係房屋或房租及工資，而非食物、燃油。假設未來美國樓價回落，理論上美國CPI未來升幅唔會加速。密歇根大學估計，未來五年美國平均通脹率只有2.9％（甚至較近期3.2％仲低）。

　　國際能源署今年7月初警告，美國、日本、歐盟等世界主要經濟體近兩年加快推進「糧食與能源」結合策略，導致另一場危機爆發。世界上發達國家對能源需求過去只影響油價，近年策略將改變世界糧食價格及供應格局：大量玉米用作生產燃料乙醇，今年美國乙醇產量達八十億加侖，將消耗今年美國玉米總產量 27％，未來五年美國三分一玉米產量用於生產燃料乙醇，令飼養成本上升，刺激肉價上揚。如美國三分一玉米用作生產燃料乙醇，可供出口玉米數量將明顯減少，令全球玉米價格上漲。日本不但建立160天以上戰略石油儲備，更到巴西、泰國等地收購糧食資源，興建燃料乙醇生產企業，令呢D糧食生產大國農作物成為燃料乙醇原料，例如巴西甘蔗。估計到2016年因大量農產品用作生產燃料乙醇，將令未來十年農產品價格不斷走高，對依賴農產品入口貧窮國家人民而言，將係另一場危機。

　　中國可耕地唔多，加上水資源匱乏，正步入糧食進口超過出口期，直接成為高糧食價格下受害國。

王軍居安思危挽救中信集團

　　王軍服務中信集團二十七年，曾執掌超過7000億美元資產。去年退休後開始另一次創業，計劃新疆投資10億元收購及擴建三個煤炭生產基地，2008 年以後再投資20億至30億元新疆進行煤炭化工及煤電專案。另入股烏魯木齊市商業銀行，計劃擁有絕對股權，該行2005年總資產173.22億元，獲利 1.65億元，估計控制權值數億元。並計劃烏市頭屯河區建設一處大型新疆國際會展中心，估計投入資金唔少於10億元；加上去年9月收購新疆托克遜露天煤礦及托克遜露天煤礦運輸公司80％，收購價6500萬元，另加投資5000萬元，即總投資1.15億元。去年7月27日六十五歲王軍離開中信集團董事長職位後，境外融資約50億元，成立中國天然投資控股公司，另創一番事業。

　　1979年作為國家副主席王震之子，王軍協助另一國家副主席榮毅仁來港創立中信集團呢間窗口公司，一做就做二十七年，去年7月27日由副董事長孔丹出任董事長，由建行行長常振明出任公司總經理（常振明過去曾出任中信副總經理）；當時傳常振明出任中信總經理，就係為將中信銀行上市做工夫。1979年王軍三十八歲，毅然跟隨六十三歲榮毅仁來港創業，建立今天巨型國有企業中信集團，1995年升任董事長；1996年佢出讓旗下中信泰富（267） 18％股權，每股32元，其後中信泰富股價漲上58元，被人指摘係國有資產最大一次流失，亦有中央領導搵佢傾偈。今天回望，如果唔係佢1996年為中信集團集資108億元資金，點樣應付1997年亞洲金融風暴?呢筆資金不但鞏固整個中信集團財政狀況，同時有條件作低價擴張，才有中信今天成績。 2003年當人們認識到此事時同王軍講起，他顯得好平靜，只係話佢做一件應做事。佢接手中信集團之時，整個中信集團賬面上只有200萬元現金，實在太危險，減持18％中信泰富後，中信集團一下子有108億元資金，可用作應付難關（如難關出現話）。佢呢種居安思危作風值得大家學習。呢次佢透過境外集資大舉進軍蒙古，絕對唔係魯莽行動，大家點睇?

　　點樣保持青春? 飲食十戒

　　一、少吃經處理過食物，例如罐頭或醃菜、鹹魚、火腿等，呢類食物唔係鹽太多就係糖太多。

　　二、每天吃五至十種蔬果及唔好飲果汁（因糖分太高），最好每天吃D洋蔥。

　　三、唔好吃Omega-6油類（例如薯片、焗蛋糕、人造牛油或任何經高溫處理油），改吃Omega-3油（通常存於魚、雞蛋及橄欖油之中），其中又以第一次橄欖油（extra-virgin olive oil）最好。雞蛋每天唔好吃太多，亦唔好唔吃，每天一隻就最好。

　　四、盡量少吃糖及代糖。糖不但無益，而且加速腦衰退；養成無糖生活習性（除蜜糖），尤其係代糖更加無益。

　　五、吃優質碳水化合物，因為三脂甘油酸飽和量低，例如椰菜花、萵苣、洋蔥、紅蘿蔔等。最好以上述植物代替每天其中一餐（例如早餐），同時減少吃麵包及米飯。

　　六、喝未經發酵茶，每天最少兩杯（可以係綠茶，但飲中國茶證明更好），例如香片、龍井、玫瑰茶等。經發酵紅茶一樣有效，因為含較低氟化物，功效差D。大部分長命百歲中國老人都有天天飲茶習慣。

　　七、唔好用銀粉補牙，改用磁粉，因為銀粉含水銀，會傷害你神經及腦細胞。

　　八、唔好長期處於壓力下，每天必須八小時睡眠。睡眠充足係另一防止衰老良方，如無法避免壓力，段日子多D吸收魚肝油（例如食魚油丸對抗精神壓力）。

　　九、唔好讓自己陷入情緒低潮，凡事向好一面睇，如諗唔通便唔去諗。阿媽教落，天大事每晚十二點之前要想通，如果晚上十二時前仲諗唔通便唔再去想，以免影響睡眠（留番明天才諗）。

　　十、每星期讓自己少吃一餐。好多宗教都有齋戒儀式，原來對身體十分好。最佳建議係每星期少吃一餐午餐，咁做身體會動用貯藏下來養分去修補器官上微損傷；如每星期有一天讓身體自己去修補器官上微損傷，自然活得更好。

　　上述十大健康要訣，要做到並唔難。希望所有讀者八十歲時仍身體健康。

中藥難以風行世界有因

　　中醫理論好好，但無法透過實驗室去證明藥品療效，形成中藥難以進入世界市場。無法提供充分證據證明藥品具有其所聲稱療效，係中藥不能風行世界理由。近年中醫藥已被國際醫學界認識同接受，卻無法全世界普遍使用，就係因為冇合法地位，理由係標準化唔夠。例如一個複方丹參製劑由七百家藥廠生產，每家藥廠一個標準，結果同樣係丹參製劑，標準卻唔同，人家被搞糊塗了，唯有唔用。中醫藥走向世界已叫幾十年，結果仍係走唔出華人社區，就係標準化不足，同時冇充分證據證明其藥效。